Ҳунар билан турмуш, меҳр билан кўнгил обод

Пойтахтимизнинг Мирзо Улуғбек туманида жойлашган Имконияти чекланган ўқувчи-ёшлар учун ихтисослаштирилган Республика касб-ҳунар коллежида мамлакатимизнинг барча вилоятларидан келган кар-соқов, заиф эшитувчи, кўзи ожиз, заиф кўрувчи ва ҳаракат-таянч аъзоларида нуқсони бўлган 500 нафар ўқувчи таълим-тарбия олмоқда. Улар “Кенг ассортиментдаги тикувчилик ишлаб чиқариш”, “Радиотехника ва телеаппаратларга хизмат кўрсатиш ва таъмирлаш”, “Компютер тармоқларини ишлатиш ва уларнинг дастурий таъминоти”, “Бухгалтерия иши”, “Маиший уй-рўзғор буюмларини таъмирлаш”, “Тўқимачилик галантерияси ишлаб чиқариш (кўзи ожизлар учун)”, “Поябзал иши” йўналишлари бўйича касб-ҳунар ўрганмоқда.

Шунингдек, имконияти чекланган ўқувчиларнинг жамиятга мослашувини самарали амалга ошириш мақсадида ўқув синфлари, амалиёт хоналари, спорт заллари ва 52 та йўналишда (6 та спорт, 22 та фан, 24 та касб бўйича) тўгараклар фаолияти йўлга қўйилган.

Уч қаватли бинода жойлашган ўқувчилар ётоқхонасининг ҳар бир қаватида дам олиш хоналари мавжуд. Бу ерда улар ўқишдан бўш вақтларини мазмунли ўтказади. Шунингдек, зарур техник жиҳозлар билан таъминланган кутубхонада ўғил-қизлар ўзларининг билимини мустаҳкамлайди.

Ўқувчиларнинг интизомли, замонавий билимлардан бохабар бўлишлари йўлида Маъмура Халилхўжаева, Зарифа Мусахўжаева, Ихтиёр Ботиров, Низомиддин Умиров, Моҳира Жуманиёзова, Шаҳноза Юсупова, Ўктамхон Қўлдашева каби тажрибали тарбиячиларнинг алоҳида ўрни борлигини таъкидлаш жоиз.

Яқинда мазкур ўқув масканида қизлар ўртасида маънавий-маърифий ишларни юксалтириш, илм-маърифатни, соғлом турмуш тарзини тарғиб этиш, оналик ва болаликни ижтимоий ҳимоялаш бўйича мамлакатимизда олиб борилаётган ислоҳотлар моҳиятини ёшлар онгига етказиш мақсадида “Зеболар баҳси” кўрик-танлови ўтказилди.

Мазкур кўрик-танловда коллежнинг зукко, истеъдодли ва зебо ўқувчиларидан бир гуруҳи “Таништирув”, “Савол-жавоб”, “Саҳна кўриниши”, “Алла айтиш” шартлари бўйича беллашдилар.

Қизлар замонамиз аёлининг спорт, санъат, тадбиркорлик соҳаларидаги эришаётган улкан ютуқлари, оналик ва болаликни муҳофаза қилиш, қизларни турмушга тайёрлаш, “Никоҳ шартномаси” ва “Тўйдан олдинги тиббий кўрик” масалаларидаги билимлари, кийиниш маданияти, меҳр-оқибат тушунчалари, миллий урф-одатларимиз акс этган саҳна кўринишлари орқали ўзларининг билим ва салоҳиятларини намойиш қилдилар. Айниқса, иштирокчилар томонидан ижро этилган муқаддас анъаналаримиз ва миллий урф-одатларимиз акс эттирилган саҳна кўринишлари ҳамда ўзига хос “Алла” ижроси барчага завқ бағишлади.

Ҳакамлар ҳайъати танлов иштирокчиларининг билим савиясини тўртта шарт бўйича 10 баллик тизимда баҳолади. Танлов натижасига кўра Каромат Жўраевага 1-ўрин насиб этди. 2-ўринга Гуласал Ҳайитова ва Маҳбуба Хуррамова, Чарос Турдибекова, Лобар Мусабоева 3-ўринга сазовор бўлдилар. Ғолибларга коллежнинг ҳамда ҳомий ташкилотларнинг фахрий ёрлиқлари ва эсдалик совғалари топширилди. Бундай тадбирларнинг ўтказилиши ўғил-қизларнинг ўзига ва ҳаётга бўлган ишончини мустаҳкамлашга хизмат қилмоқда.