Ҳамма гап самимиятда

Чарли Чаплин ҳикматларидан

• Комедия суратга олиш учун менга парк, полициячи ва битта чиройли қиз кифоя қилади.
• Севилмаганларгина нафратланадилар.
• Мен сийқаси чиққан мавзудан қўрқмайман. Ҳаётнинг ўзи тўласича сийқалик. Ахир ҳар биримиз яшаймиз ва ўламиз, бир кунда уч маҳал овқатланамиз, севамиз ва севмай қўямиз.
• Ҳаётдаги энг қайғули ҳол – ҳашаматга ўрганиб қолишдир.
• Ҳеч қачон бола бўлмаганлар катта ҳам бўлмайдилар.
• Ҳамиша ерга қараб юрадиган одам камалакни кўролмайди.
• Табассумсиз кун – йўқотилган кун.
• Ақл мени хавотирга солиши, ҳатто касал қилиб қўйиши мумкин. Бироқ уни юрагим билан уйғунлаштира олсам, у ўша заҳотиёқ менинг бебаҳо иттифоқчимга айланади.
• Мен камбағалликда ҳеч қандай жозиба ёки ибрат кўрмайман. У менга ҳеч нарсани ўргатмади, ҳаётий қадриятлар ҳақидаги тасаввурларимни бузди, холос. Жамиятнинг олий синфи деб аталувчи бойларнинг иқтидори ва фазилатларини ҳурмат қилмасликни уқтирди.
• Ҳамма гап самимиятда. Чол банан пўчоғига сирпаниб йиқилиб тушди – бунга кулмаймиз. Лекин бу ҳолат такаббур ва бой жентелмен билан содир бўлса, мириқиб хохолаймиз.
• Менинг оғриғим кимнингдир кулгисига сабаб бўлиши мумкин, лекин менинг кулгим кимнингдир оғриғига сабаб бўлмаслиги керак.
• Ойна – менинг энг яхши дўстим. Чунки йиғлаган пайтим у ҳеч қачон кулмайди.
• Фикрлаш қобилияти скрипка ёки роял чалишга ўхшайди. У билан ҳар куни шуғулланиб туриш керак.
• Ҳаёт репетиция қилинмайдиган пьесадир. Шу боис парда тушиб, спектакль тугамагунича ҳеч қандай қарсакни кутмай куйланг, йиғланг, рақсга тушинг, кулинг ва қўлингиздан келганича яхши яшанг.

Ориф ТОЛИБ таржимаси