“ГУЛШАНИ ОДАМ САМАРИ СЎЗДУРУР”

Алишер НАВОИЙ

Одамий бадандур, ҳиммат анга руҳ,

Ҳиммат аҳлидин оламда юз минг футуҳ.

Одам бир бадан бўлса, ҳиммат унга руҳ(жон)дир, оламдаги барча эзгуликлар ҳиммат аҳли туфайлидир.

* * *

Ушоқ қанд оқ тузга монанд эрур,

Ва лекин бири туз, бири қанд эрур.

Кўринишда шакарнинг туздан фарқи йўқдир, лекин биттаси туз биттаси қанддир.

* * *

Улча эрур тифлға шойиста иш,

Билки, кичикликда эрур парвариш.

Болага лойиқ иш - уни ёшлигида тарбиялашдир.

* * *

Қатрага чун тарбият этди садаф,

Эл бошига чиққуча топти шараф.

Садаф бир томчини тарбия қилгач, тарбия натижасида ул томчи одамларнинг бошларига кўтарилиш даражасига етди.

* * *

Яхшилиғ гар қилмаса, бори

ёмонлиғ қилмаса,

Ким ёмонлиғ қилмаса,

қилғанча бордир яхшилиғ.

Қани энди, яхшилик қилмайдиган киши сира ёмонлик ҳам қилмаса! Унинг ёмонлик қилмагани яхшилик қилган билан баробар.

* * *

Ростдур улким, назари тўғридур,

Ким илиги эгридур, ул ўғридур.

Назари тўғри кишининг ўзи ҳам тўғри, қўли эгри кимса эса ўғридир.

* * *

Одамийға яхши кўп авсоф эрур,

Лек аларнинг ашрафи инсоф эрур.

Инсонга хос яхши фазилатлар кўп, лекин уларнинг энг афзали инсофдир.

* * *

Не қушким, бўлса ҳимматдин қаноти,

Эмас паст ошёнга илтифоти.

Қаноти ҳимматдан иборат бўлган қушнинг паст уяга майли бўлмайди.

* * *

Маъдани инсон гуҳари сўздурур,

Гулшани одам самари сўздурур.

Инсоният маъданларининг қимматбаҳо инжулари ҳам сўздир. Одамият чаманзорининг меваси ҳам сўздур.

* * *