Бола ҳуқуқи журналистлар нигоҳида

2014-йил 26-апрель куни Тошкент шаҳри “Гранд Орзу” меҳмонхонасида бўлиб ўтган “Журналистика факултетларининг талабалари учун болалар масалаларини ёритиш ва журналист этикаси бўйича махсус ва факултатив курсларни татбиқ этиш” лойиҳаси доирасида тайёрланган ўқув қўлланмаларнинг тақдимоти бўлиб ўтди.

Президентимиз ташаббуси билан 2014 йилни Соғлом бола йили, деб номланиши ва бу борада давлат дастурининг қабул қилиниши, Бола ҳуқуқлари тўғрисидаги Конвенсиянинг 25 йиллиги нишонланиши замирида ҳам ўсиб келаётган ёш авлодни соғлом, баркамол, ҳар томонлама етук қилиб тарбиялаш мақсади ётади. Мамлакатимиз аҳолисининг катта қисмини болалар ташкил этишини инобатга олсак, бола ҳуқуқларини ўрганиш, уларга асосий эътиборни қаратиш куннинг долзарб масалаларидан биридир. Бу борада ОАВнинг ўрни ва вазифалари ҳам алоҳида аҳамиятга эга. Бола ҳуқуқларини ўрганиш ва таъминлаш, бунга алоҳида эътибор бериш ва болалар масалаларига оид қонунлар амалга оширилишини таъминлашда ОАВ нинг ўрни беқиёс. Шуни назарда тутиб, Марказий Осиёда биринчилардан бўлиб Ўзбекистон давлат жаҳон тиллари университети халқаро журналистика факултетида 2012-йил август ойидан 2014-йил 31-январьгача журналистика факултетларининг талабалари учун болалар масалаларини ёритиш ва журналист этикаси бўйича махсус ва факултатив курсларни татбиқ этиш лойиҳаси амалга оширилди.

Лойиҳа давомида журналистика факултети талабалари ва болалар таҳририятлари ходимлари учун “Ўзбекистон ОАВ болалар мавзусини ёритишнинг назарий ва амалий асослари” ўқув-амалий қўлланмаси, республика журналистлари учун “Болалар масалаларини ёритиш бўйича ОАВ ходимларига эслатма” ва талабаларнинг ёзги амалиёти давомида тайёрлаган болалар мавзусидаги материаллари асосидаги мақолалари тўплами тайёрланди.