БАХТИЁР АВЛОДМИЗ

Бахтимиз Қомуси бўлмиш Конституциямиз ҳақ-ҳуқуқларимиз пойдеворидир. Ҳар гал уни қўлимга олиб қайта-қайта ўқийман. Қомусимизнинг ИХ-боб 41-моддасида “Ҳар ким билим олиш ҳуқуқига эга. Бепул билим олиш давлат томонидан кафолатланади. Мактаб ишлари давлат ҳимоясидадир” дея кўрсатилган.

Шу боис ҳам мен ва менинг тенгдошларим барча шароитларга эга бўлган мактабларда яйраб билим олмоқдамиз. Шу ўринда бир савол туғилади.

Хўш, бундай қулай шарт-шароитларлардан биз қандай фойдаланаяпмиз? Бунга жавобан аввало синфимиз ўқувчиларининг деярли барчаси аъло ва яхши баҳоларга ўқиб, турли фан олимпиадаларида мунтазам ғолибликни эгаллаб келаётганини таъкидлагим келади. Жамоат ишларида ҳам фаол иштирок этамиз. Барча устозларимиз, ота-онамиз сингари бизни қўллаб-қувватлаши ютуқларимиз гаровидир. Ўзим эса она тили ва адабиёт фанини яхши кўраман, шеърлар машқ қиламан. Яқинда менинг биринчи шеърим матбуотда чоп этилди. Бутун синфимиз мени қутлаганида қалбим ҳаяжонга тўлиб кетди. Газетани ўқиётган бобожоним, баракалла менинг бўлғуси шоира қизим,– дея мақтаб қўйди. Шундай озод ва обод юртда яшаётганимдан фахрланаман. Президентимиз Ислом Каримов “Юксак маънавият – енгилмас куч” асарида шундай дейди: “Маълумки, бугун биз юртимизда халқимиз хоҳиш-иродасининг ифодаси бўлган Конституция ва қонунлар асосида демократик дунёвий давлат барпо этмоқдамиз. Бу давлат, авваламбор, дунёвий тараққиётга, унинг энг илғор ютуқ ва натижаларига таянади”. Демак, биз ёшлар ҳам ана шу тараққиётга пухта билимимиз билан ҳисса қўшишимиз лозим.