“Камолот” кубоги ғолибалари аниқланди
Пойтахтимиздаги “Камолот” спорт-саломатлик мажмуасида бадиий гимнастика бўйича “Камолот” кубоги мусобақаси ўтказилди.
Мамлакатимизнинг барча ҳудудлари, жумладан, олис туман ва чекка қишлоқларда ҳам шароит ва имкониятларига кўра шаҳардагидан асло қолишмайдиган замонавий болалар спорти иншоотлари барпо этилмоқда. Халқаро андозалар даражасида жиҳозланган марказ ва секциялар, спорт комплекслари фаолият кўрсатмоқда. Айниқса, қизларнинг жисмоний тарбия ва спорт билан мунтазам шуғулланишига доимий эътибор қаратилаётир.
Мутахассисларнинг таъкидлашича, бадиий гимнастика юртимизда қизлар ўртасида жадал оммалашаётган спорт турларидан биридир.
“Камолот” ёшлар ижтимоий ҳаракати Тошкент шаҳар кенгаши томонидан ташкил этилган мазкур мусобақада элликдан зиёд гимнастикачи ўзаро куч синашди.
Икки кун давом этган мусобақада Эъзоза Нурмуҳаммедова, Шаҳзода Ҳикматова, Висола Мираҳмедова, Лазиза Мирзааҳмедова, Хонзода Ўрозбоева, Мадина Абдулҳамидова, Малика Эргашева, Вероника Цой, Дилнура Анварова, Гўзал Абдураззоқова, Нафосат Маннонова, Мўътабар Бобохўжаева ўз ёш тоифаларида шоҳсупага кўтарилди.
Н.Норбобоев
