КЎРКАМ БОҒЛАР – ЮРТ КЎРКИ
Ўзбекистон Экологик ҳаракати ва БМТнинг Ўзбекистондаги ваколатхонаси ҳамкорлигида Алишер Навоий номидаги Ўзбекистон Миллий боғида ташкил этилган экобоғда «Биз – баркамол ёшлар Ватан ободлиги ва озодалигига масъулмиз» шиори остида экологик акция ўтказилди.
Тадбирда Ўзбекистон Экологик ҳаракати марказий кенгаши ижроия қўмитаси раиси ўринбосари С.Сангинов ва бошқалар Наврўз байрами муносабати билан ҳашар ўтказиш халқимизнинг хайрли анъаналаридан бўлиб, унинг замирида аждодларимизнинг табиатга бўлган беқиёс муҳаббати, эзгу қадриятларимизни келгуси авлодларга мукаммал етказишга интилиш ҳисси намоён бўлишини таъкидлади.
Мамлакатимизнинг турли ҳудудларида ташкил этилган, умумий майдони қарийб 120 гектардан иборат йигирма бешдан зиёд экобоғларга ўттиз минг туп мевали ва манзарали дарахт кўчати ўтқазилган.
Экологик акциядан кўзланган мақсад халқимизга хос эзгу фазилатларни намоён этиш, ободонлаштириш ва кўкаламзорлаштириш, санитария-эпидемиологик ҳолатни янада яхшилаш, “Соғлом она ва бола йили” Давлат дастурида қайд этилган вазифаларни амалга оширишдан иборат.
Ободонлаштириш ва кўкаламзорлаштириш ойлиги доирасида ўтказилган экологик акцияда ёшлар дарахтлар тагини юмшатиб, уларни оқлади, шакл берди, янги ниҳоллар ўтқазди.
З.МАМАТҚУЛОВА
