ХАВФЛИ КАСАЛЛИКЛАРГА ҚАРШИ МУСТАҲКАМ ТЎСИҚ
Ўзбекистон Республикаси Фавқулодда вазиятлар вазирлигида Қрим-конго геморрагик иситмаси профилактикаси ва тарқалишига қарши курашишга бағишланган анжуман бўлиб ўтди. Унда мазкур хавфли касалликнинг юқиш йўллари, аломатлари ва профилактикасига доир масалалар муҳокама қилинди.
Мамлакатимизда хавфли вирусли касалликлар, жумладан, Қрим-конго геморрагик иситмасининг олдини олиш ва тарқалишига қарши курашиш мақсадида кенг кўламли ишлар амалга оширилмоқда. Ўзбекистон Республикаси Вазирлар Маҳкамасининг “Ўзбекистон Республикаси фавқулодда вазиятларда уларнинг олдини олиш ва ҳаракат қилиш давлат тизимини янада такомиллаштириш тўғрисида”ги қарори бу борада муҳим ҳуқуқий асос бўлиб хизмат қилмоқда.
Бундан ташқари, ушбу вазирлик мутахассислари мамлакатимиз бўйлаб карантин ва ўта хавфли инфекцияларнинг пайдо бўлиши ва четдан кириб келишига йўл қўймаслик мақсадида амалга оширилаётган профилактик тадбирларни ўрганиб чиқди. Ўрганиш якунлари бўйича зооантропоноз юқумли касалликларига қарши курашишни янада кучайтиришга имкон берадиган тадбирлар режаси тузилди.
В.ПЎЛАТОВА
