ҲАМ СПОРТЧИ, ҲАМ МУРАББИЙ
Ўзбекистон Болалар спортини ривожлантириш жамғармаси томонидан ўтган йилда қатор давлат ва жамоат ташкилотлари билан ҳамкорликда қирқдан ортиқ спорт тури бўйича мамлакат миқёсида кўплаб мусобақалар ўтказилди. Уларга 6 минг 782 нафар ўқувчи-ёш жалб этилган. Қувонарлиси, ушбу иштирокчиларнинг 2 минг 721 нафарини қизлар ташкил этди.
Ўзбекистон чемпиони шаҳрихонлик Мухлиса Жўраева Бўз педагогика коллежида ўқиб юрган пайтларида, мураббийлари Равшанбек Исроилов, Шерзодбек Тожиматов ҳамда Шоҳиста Исмоиловадан миллий курашнинг сир-асрорларини қунт билан ўрганди. Натижада, туман, вилоят, кейинчалик эса республика чемпионатларида қатнашиб, совринли ўринларни эгаллади.
– Ютуқларимда ота-онам, устозларимнинг ҳиссалари катта, – дейди Мухлиса. – Чунки улар мени ҳар доим қўллаб-қувватлаб турадилар. Келажакда уларнинг ишончини оқлаш ва халқаро мусобақаларда Ўзбекистонимиз шарафини муносиб ҳимоя қилишга ҳаракат қиламан.
Юксак орзулар билан яшаётган Мухлиса айни пайтда тумандаги 55-умумтаълим мактабида ёш иқтидорли спортчиларга мураббийлик қилмоқда. Ўқувчилар учун дарс машғулотларидан сўнг миллий кураш тўгарагини ҳам ташкил қилган. Муассасада барча имкониятларга эга, янги спорт анжомлари билан тўла таъминланган спорт зали ҳам ёшлар ихтиёрида.
Мухлисанинг Моҳидил Ғуломжонова, Муниса Ғаниева, Феруза Зокирова, Зардона Ўткирбоева каби истеъдодли шогирдлари вилоят ва республика миқёсидаги мусобақаларда қатнашиб, юқори натижаларга эришаётир.
Миролим ИСАЖОНОВ,
Андижон вилояти
