“СОҒЛОМ АВЛОД” КУНЛАРИ

И Республика тиббиёт коллежида “Соғлом авлод кунлари” мавзусида тадбир бўлиб ўтди. Ўзбекистон Республикасида хизмат кўрсатган журналист Раъно Зарипова коллежнинг “Маънавият ва маърифат” хонасида муассасанинг иқтидорли талабалари билан учрашиб, “Соғлом авлод” газетаси қошида ташкил этилган “Озод юрт болалари” клубининг фаолияти ҳақида гапириб берди. Шунингдек, коллежда ташкил этилган “Нафосат” клуби қатнашчилари билан яқиндан танишди. Ўқувчиларга ўз мақсад ва интилишларини янада юксалтириш борасида ўз маслаҳатларини берди.

Шунингдек, коллежнинг “Мажлислар зали”да клубнинг кўчма йиғилиши ўтказилди. Таҳририят аъзолари “Соғлом авлод” газетасидаги ёшларга аталган кўплаб саҳифалар, тиббиёт соҳасидаги янгиликлар, спортнинг ҳаётимиздаги тутган ўрни ва истеъдодли болаларнинг газетадаги чиқишлари, ёшлар ўртасида ўтказилаётган танловлар ҳақида маълумотлар беришди.

Ўзбекистон Давлат Жаҳон тиллари университети стажёр-тадқиқотчи-изланувчиси Ойдин Саъдуллаева ХХ асрда ахборот технологияларининг кескин тараққий этиши ахборот оқимининг тезлашувига таъсир қилиб, “ахборотни бошқариш”, “ахборий-психологик таъсир” каби тушунчалар ҳам юзага келишига олиб келганлиги, оммавий ахборот-коммуникация воситалари орқали кишилар онгига таъсир қилиш, жамоатчилик фикрини шакллантириш авж олганлиги хусусида гапирди. Интернетдан фойдаланаётганда маънавиятимизга ёд бўлган оқимларга тушиб қолмаслик, саралаб ўқиш ва танлаган далилларни чуқур мулоҳаза қила олиш лозимлиги хусусида суҳбатлашди.