Маҳорат дарслари истеъдодларни тоблайди

Бола дунёни беғубор нигоҳлари билан кўради. Улар чизган тасвирларда бу ҳолат яққол сезилиб туради. Яқинда “Тасвирий санъат фестивали” доирасида ёш ижодкорлардан ташкил топган “Нигоҳ” гуруҳи пойтахтимиздаги 100-махсус мактабнинг ўқувчилари билан тасвирий санъат маҳорат дарсларини ташкил қилишди. Тадбир Соғлом бола йилига бағишланди.

Унда ушбу мактабда таҳсил олаётган 20 нафар иқтидорли бола иштирок этди. Ўқувчилар гарчи жисмоний имконияти чекланган бўлсада тасвирий санъатдаги ўз истеъдодларини намойиш эта олишди. Улар тадбирда манзара, маиший жанрлардаги бетакрор асарларни яратди. “Нигоҳ” гуруҳининг бундай маҳорат дарслари анъана тусига кириб, бу йил учинчи бора ташкил этилмоқда. Ундан кўзланган мақсад тасвирий санъатга қизиқувчи иқтидорли ёшларнинг ижодий ишларини кенг оммага намойиш этишдан иборат. Шунингдек, маҳорат дарсига ташриф буюрган Ўзбекистон Бадиий Академияси раиси, халқ рассоми Акмал Нуриддинов ўқувчилар иқтидорини юксак баҳолади.

Тадбирда эркин мавзуда расмлар ишланди. Асосий эътибор эса асарларнинг ғояси, тасвирий ечими, ранглар уйғунлигига қаратилди. Энг яхши ижодий иш муаллифлари Ўзбекистон Бадиий академиясининг диплом ва эсдалик совғалари билан тақдирланди.