Ижтимоий муҳофаза – давлат эътиборида
Ҳукуматга қарашли бўлмаган «Соғлом авлод учун» халқаро хайрия жамғармаси ижтимоий ҳимоя масаласида салмоқли ишларни амалга ошириб келмоқда. Жамғарманинг хорижий ҳамкорлари томонидан юборилган мурувват ёрдамлари – дори-дармонлар, тиббий жиҳозлар, кийим-кечаклар тумандаги ижтимоий ҳимояга муҳтож оилаларга, ногирон болаларга ўз вақтида етказиб берилмоқда. Бундан ташқари республика шифохоналарида туғма танглай нуқсони, тананинг бўйин ва оёқ қисмида нуқсони бўлган болалар бепул жарроҳлик амалиётидан ўтказилди. Шунингдек, Ҳаётбек Душамов, Дилсўз Юсупова, Ҳуррият Рўзметоваларга ногиронлик аравачалари топширилди.
– Юртимизда аҳоли саломатлигини мустаҳкамлаш йўлида амалга оширилаётган ишлар, соҳада олиб борилаётган туб ислоҳотлар дунё жамоатчилиги эътирофига сазовор бўлаётгани барчамизга ғурур ва ифтихор бахш этади, – дейди жамғарманинг Хоразм вилояти Шовот тумани таянч пункти раҳбари Гулсора Жуманиёзова.
Ҳозирда таянч маскани томонидан аҳолининг тиббий маданиятини ошириш, улар ўртасида соғлом турмуш тарзини кенг тарғиб этиш мақсадида 2013 йилнинг дастлабки олти ойи давомида 41 та маънавий-маърифий, 4 та спорт ва соғломлаштириш, 156 та хайрия тадбирлари, жами 201 та тадбир ўтказилди.
Шукуржон ЖАББОРОВА,
журналист
