Полвонларимизнинг тўрт медали
Москвада ўтказилган «Катта дубулға» туркумидаги халқаро турнирда Ўзбекистон терма жамоаси аъзолари икки кумуш ва икки бронза медаль жамғарди.
Халқаро дзю-до федерациясининг (IJF) энг нуфузли мусобақаларидан бири – «Катта дубулға» туркумидаги ушбу турнирда дунёнинг қирқ мамлакатидан 300 нафарга яқин энг кучли дзю-дочи совринли ўринлар учун ўзаро куч синашди.
Мусобақада Ўзбекистон терма жамоасининг янги аъзоси – Эркин Дониёров 90 килограмм вазн тоифасидаги саралаш учрашувларида словакиялик Милан Рандл, чехиялик Александр Юречка, япониялик Хиротака Катони енгиб, иккинчи ўринни олди.
100 килограмм вазн тоифасида татамига чиққан Осиё чемпиони Рамзиддин Саидов грузиялик Варлам Липартелиани, россиялик Сергей Самойлович, бразилиялик Лусиано Корреа устидан қозонган ғалабалари эвазига кумуш медални қўлга киритди.
Тажрибали спортчиларимиздан Наврўз Жўрақобилов ҳамда Мирзоҳид Фармонов шоҳсупанинг учинчи поғонасини эгаллади.
Зоҳир ТОШХЎЖАЕВ,
ЎзА мухбири
