ТЭНГДОШИМИЗ ЧЭМПИОН

Айни вақтда юртимизда яратилаётган кенг имкониятлардан оқилона фойдаланиб Ватанимиз номини дунёга танитаётган ёшларимиз бисёр.

Тенгдошимиз Абдурауф Норқулов ҳам спортнинг бокс тури билан жиддий шуғулланиб, юртимиз спорти ривожига ўз ҳиссасини қўшиш ниятида тинимсиз изланмоқда. 2009-йилдан бошлаб “Комбат Айкидо” спортининг Накаун ва Фуллконтакт йўналишлари бўйича “Легион” клубида қатнашиб, мураббий Бахтиёр Юллиевдан бу спорт турининг сир-синоатларини қунт билан ўргана бошлади. Абдурауф қисқа вақт ичида юқори натижаларга эришиб, дастлаб 2011-йил Тошкент вилояти очиқ чемпионатида 3-ўринни эгаллади. Шу йилнинг июль ойида Фарғона вилоятида ўтказилган халқаро турнирда ва август ойида Тошкент шаҳар очиқ чемпионатида фахрли 1-ўринларни қўлга киритди. Сўнг Тошкент шаҳрида бўлиб ўтган Республика турнирида 2-ўринга сазовор бўлди. Ўз устида тинимсиз ишлашда давом этган ёш спортчи 2012-йил апрель ойида Амир Темур хотирасига бағишланган Республика спорт мусобақасида Фуллконтакт йўналиши бўйича 1-ўринни эгаллаб, олтин медал билан тақдирланди. У энг катта ютуғини 2012-йил 9-октябрьда Тошкент шаҳрида ўтказилган мусобақада қўлга киритди. Иқтидорли спортчи ушбу турнирда чемпионлик камари соҳибига айланди ва ота-онаси, устозлари ишончини оқлади. 6-9-декабрьда эса Фарғонада Амир Темур олтин кубогида фуллконтакт йўналиши бўйича 1-ўринни эгаллади.

– Келгусида албатта, жаҳон чемпиони бўлиб, юртимизга муносиб фарзанд бўлишга ҳаракат қиламан, – дейди умидли спортчимиз.

Оилада тўрт фарзанднинг иккинчиси бўлган Абдурауф Самарқанд вилояти Иштихон туманида таваллуд топган. Ҳозирги кунда Ўзбекистон Миллий Университети қошидаги С.Сирожиддинов номидаги академик лицейида гуманитар йўналишда таҳсил олмоқда. Барча устозлари ва курсдошлари уни қўллаб-қувватлайди ҳамда ҳар бир мусобақа олдидан омад тилайди.