Спорт – менинг ҳаётим

Пойтахтимиздаги 28-сонли болалар ва ўсмирлар спорт мактаби 2013 йил апрель ойида ташкил этилди. Аслида 17– сонли болалар ва ўсмирлар жисмоний тарбия клуби номи билан фаолият юритган бу спорт мажмуаси 2012 йилда капитал таъмирланди ва спорт мактабига айлантирилди.

Бугунги кунда спорт мактабимизда мини футбол, бадиий гимнастика, акробатика, дзюдо, таеквондо ВТФ, енгил атлетика, велоспорт, юнон-рум кураши, у-шу сингари спорт турлари билан 369 нафар бола ва ўсмирлар мунтазам шуғулланадилар.

Спорт мактабида 1 нафар олий тоифадаги мураббий, 3 нафар халқаро тоифадаги спорт устаси, 4 нафар биринчи тоифали ҳамда 6 нафар малакали мураббийлар фаолият кўрсатмоқда.

Спорт мактабимиз ташкил этилганидан бери унчалик кўп вақт ўтмаган бўлсада, бугунги кунда муассаса тарбияланувчилари кўплаб нуфузли мусобақаларда совринли ўринларни қўлга киритиб келмоқда. Жумладан, спортнинг Таеквондо ВТФ тури бўйича 2013 йил 22-24 ноябрь кунлари ўтказилган Ўзбекистон чемпионатида Игор Сой, Вова Абдуразаков ҳамда Александр Сигановлар биринчи ўринни эгаллаб, Ўзбекистон чемпиони деган номга сазовор бўлишди.

2014 йил январь ойида эса енгил атлетика бўйича Ўзбекистон қишки очиқ биринчилигида Руслан Малинин баландликка сакраш машқларида муваффаққиятли иштирок этиб спорт усталигига номзод бўлди. Шу билан бир қаторда, коллежлари Олимпия заҳиралари ҳамда болалар ва ўсмирлар спорт мактаблари ўртасида енгил атлетика бўйича ўтказилган 39-Ўзбекистон чемпионатида ҳам спорт мактабимиз ўқувчиси Темур Раҳматуллаев қатнашиб, фахрли 2 ўринни эгаллади.

Бугунги кунда спорт мактабимизда шуғулланувчи ёшлардан 4 нафари спорт усталигига номзод, 2 нафари 1-тоифали спортчи, 29 нафари 2-тоифали спортчи номига сазовор бўлишган.

Спорт мактабида иқтидорли, спортга лаёқатли, интилувчан болалар кўп. Келажакда уларни дунё спорт майдонларида юртимиз байроғини шараф билан юқори кўтарадиган истиқболли ёшлар сафида кўришни истаймиз ва шу йўлда ҳаракат қиламиз.