“Баркамол авлод – 2017”: натижа ва сарҳисоб

25-27 май кунлари Жиззах шаҳрида академик лицей ва касб-ҳунар коллежи ўқувчилари иштирокида “Баркамол авлод – 2017” спорт ўйинлари ўтказилди.

Спортнинг 17 тури – баскетбол, волейбол, футбол, қўл тўпи, шахмат, оғир атлетика, бокс, дзюдо, таэквондо, эркин кураш, юнон-рум кураши, сузиш, енгил атлетика, теннис, стол тенниси, бадминтон ва бадиий гимнастика бўйича беллашувларда юртимиздаги лицей ва коллежларнинг 898 нафар ўқувчиси иштирок этди. Спортчилар 193 олтин, 193 кумуш ва 214 бронза медали учун ўзаро баҳс олиб борди.

Мусобақаларнинг сўнгги куни “Сўғдиёна” универсал спорт мажмуаси стадионида “Баркамол авлод – 2017” спорт ўйинларининг тантанали ёпилиш маросими бўлиб ўтди. Беллашувларда энг кўп медаль жамғариб, биринчи ўринни эгаллаган Тошкент шаҳри жамоаси бош мукофот – Ўзбекистон Республикаси Президентининг “Баркамол авлод – 2017” спорт ўйинлари қатнашчиларига табригининг асл нусхаси ва Президент совғаси – “Damas” автомобили билан тақдирланди. Умумжамоа ҳисобида иккинчи ўринни эгаллаган Андижон вилояти ва учинчи поғонадан жой олган Самарқанд вилояти жамоаларига Президент совғаси – “Damas” автомобиллари топширилди. Муросасиз курашларда алоҳида маҳорат кўрсатган, тенгқурлари орасида юқори натижаларга эришган бир гуруҳ ўқувчи-спортчилар махсус совринларга сазовор бўлди.

Мусобақаларнинг ёпилиш маросимида “Баркамол авлод – 2017” спорт ўйинларининг байроғи туширилди. Уни жиззахлик спортчилар “Баркамол авлод” мусобақасининг навбатдаги финал босқичига мезбонлик қиладиган Қашқадарё вилояти вакилларига топширди.