Баҳора – кумуш медаль совриндори
Бирлашган Араб Амирликларининг Ал-Айн шаҳрида 8 ёшдан 18 ёшгача бўлган болалар, ўсмирлар ва қизлар ўртасида ўтказилган жаҳон чемпионатида ёш шахматчимиз Баҳора Абдусатторова кумуш медални қўлга киритди.
Президентимиз Ислом Каримов раҳнамолигида мамлакатимизда болалар спортини жадал ривожлантиришга қаратилаётган алоҳида эътибор ёш авлодни жисмонан соғлом, маънавий етук, юксак интеллектуал салоҳиятли инсонлар этиб тарбиялаш ва ўзбек спортининг жаҳондаги нуфузини янада оширишда муҳим омил бўлмоқда. Айниқса, шахмат каби юксак интеллектуал салоҳият ва ўткир ақл-заковат талаб этадиган спорт турида муваффақиятга эришаётган ёшларимиз сафи тобора кенгайиб бораётгани қувонарлидир.
Дунёнинг 120 мамлакатидан энг иқтидорли шахматчилар иштирокида ўтказилган нуфузли мусобақанинг ўн тўрт ёшгача бўлган қизлар баҳсида иштирок этган Б.Абдусатторова латвиялик Дарья Литвякова, исроиллик Мичал Лаҳав, ирландиялик Диана Мирза, канадалик Кию Жоу, озарбайжонлик Нармин Маммадова, россиялик Анна Васенина ҳамда жамоадошлари Нилуфар Ёқуббоева ва Гулруҳбегим Тоҳиржонова устидан ғалаба қозониб, хитойлик Лан Яо ва озарбайжонлик Гунай Маммадзода билан дуранг ўйнади. Мусобақа давомида жаҳон чемпионлигини қўлга киритган грециялик Ставроула Цолакидоу билан бир хил – тўққиз очко жамғарган ҳамюртимиз қўшимча кўрсаткичлар бўйича иккинчи ўринни эгаллади.
Байрам АЙТМУРОДОВ,
ЎзА мухбири
