АЛОЭнинг биз билмаган хусусияти ҳақида
Асли ватани Африка бўлган бу ўсимлик юртимизга бир неча асрлар олдин кириб келган. Ҳозир диёримизда алоэнинг турфа турлари мавжуд. У манзарали ва шифобахш ўсимлик сифатида хонадонларда ўстирилади.
Ушбу ўсимликнинг қарийб 180 тури маълум. Алоэ баргидан олиб қуритиладиган шира-сабур сифатида, консервация қилинган шарбати эса турли яраларни, куйган терини, гастрит ва колитни даволашда ишлатилади.
Халқ табобатида алоэ баргидан ва унинг ширасидан турли касалликларни: ошқозон ва ўн икки бармоқ ичак яраларни, ўпка силини ва бошқаларни даволашда фойдаланилади. Таркибида бактерияларнинг кўпайишининг олдини олувчи модда бор. Шунинг учун ҳам унинг баргидан ари чаққанда, терини пичоқ ёки бошқа нарса билан кесиб олганда йиринглаб кетмаслиги учун алоэ баргини ўртасидан узунасига ёриб, дардманд жойга қўйиб боғланади. Арининг заҳрини ҳам кетказади.
Тиббиётда қўллаш учун алоэнинг янги йиғилган баргидан шира олинади ва спирт билан консерваланади. Шира бактерицид хусусиятига эга бўлиб, куйган жойни, юқумли ва бошқа яраларни ҳамда меъда ва ичакнинг баъзи касалликлари (колит, гастрит ва ҳ.к.) даволашда ишлатилади. Алоэнинг сувли экстракти иммуностимулловчи хусусиятга эга бўлиб, организмни турли касалликлардан ҳимоя қилади.
Шунингдек, биоген стимуляторларга бой алоэ баргларидан канакунжут ёғи ҳамда эквалипт эфир мойи қўшиб, алоэ эмульсияси тайёрланади. Ушбу препаратлар организмнинг касалликларга қарши курашиш қобилиятини оширади. Шунинг учун алоэ баргидан тайёрланган стимуляторли суюқ экстракт кўз касалликлари (коньюнктивит, кўз шишасимон таначасининг хиралашиши ва ҳ.к.)ни сурункали артрит, ошқозон ва ўн икки бармоқли ичак ярасини ҳам даволашда кенг қўлланилади.
Алоэ эмульсияси тери касалликларини (қуруқ ва ҳўл эпидермит) ҳамда нур билан даволаш натижасида 2-3 даражали куйган жойларни тузатишда ишлатилади.
Гинекологик хасталикларда ҳам одатда алоэ барги ширасидан бачадон эрозияси касаллигига қарши даволанади. У нафақат доривор ўсимлик балки иштаҳа очувчи ҳамдир.
Наргиза Угламова тайёрлади.
