Jigarlar
Shifoxona dahlizida ovsinlar – birovi bu burchakda, ikkinchisi – narigi burchakda, ters qaragan, lab burgan, to‘rsaygan.
Bir qarich yerni talashib, o‘n besh yildan beri gaplashmayotgan bu ikki ayol erlarini ham bir-biriga qayrab ulgurgan edi.
Ichkarida esa…
Avval aka ko‘z ochdi.
Birinchi so‘ragan savoli:
– Ukam yaxshimi?
Narigi xonada uka o‘ziga keldi.
– Hamshira, – dedi ohista ingrab. – Donor… qayerdan topildi?
– Sizga bezovtalanish mumkin emas…
– Kim deyapman? – bemorning shivirlagan ovozi tahdidona tus oldi.
– Nahotki bilmasangiz?!
…Dahlizda ters qaragan ovsinlar hamon ichkaridan mujda kutishayapti. Telemuxbir esa shifokordan intervyu olishga chog‘lanib, kameraga qarab burro-burro gapirayapti:
– Qadrli teletomoshabinlar, hozirgina mana shu klinikada o‘ta noyob implantatsiya amaliyoti muvaffaqiyatli tarzda amalga oshirildi. Aka jigarining bir qismi ukaga ko‘chirib o‘tqazildi…
Nuriddin EGAMOV
