Тил ўргатишда самарали ёндашув
2014 йилда “Йилнинг энг яхши фан ўқитувчиси” республика кўрик-танловида олий ўринни эгаллаган Гулшана Маҳмудова НамДУнинг хорижий филология факультетини тамомлаб, Наманган шаҳридаги 6-ихтисослашган умумтаълим мактабида инглиз тили фанидан дарс бера бошлаганига ҳам ўн йил тўлди.
Давлатимиз раҳбарининг 2012 йил 10 декабрда қабул қилинган “Чет тилларни ўрганиш тизимини янада такомиллаштириш чора-тадбирлари тўғрисида”ги қарори ижроси доирасида вилоят умумтаълим мактаблари ўқитувчилари учун ташкил этилган “Инглиз тилини ўқитишда янги педтехнология ва АКТдан фойдаланиш” мавзуидаги семинарда Гулшана мураббий сифатида иш олиб борди.
– Ҳар бир ўқувчи билан индивидуал шуғулланишга ҳаракат қиламан, – дейди Г.Маҳмудова. – Дарсда мультимедиа воситаларидан кенг фойдаланаман. Ўқув машғулотларини шу тарзда ташкил этиш ўз самарасини бермоқда: яқинда 1-синф ўқувчилари ўртасида сўров ўтказилганда, инглиз тили фанини ўзлаштириш 84 фоиз ошгани маълум бўлди.
Ҳотам МАМАДАЛИЕВ
(ЎзА) олган сурат.
