Иқтидорли қизлар сараланди
Ҳамза туманидаги 198-умумтаълим мактабининг анжуманлар залида «Зулфияхоним қизлари» кўрик-танловининг туман босқичи бўлиб ўтди.
Ушбу босқичда иштирок этиш учун тавсия этилган қизлар, бешта – адабиёт, санъат, маданият, фан ва таълим йўналишларида ўзаро беллашдилар.
– Зулфия номидаги Давлат мукофотига тавсия этилганларнинг саралаш босқичида туманимиздаги ўқув-муассасаларида таълим олаётган ўндан ортиқ иқтидорли қизлар ўзларининг адабиёт, санъат, фан, таълим ва маданият соҳаларида, шунингдек, миллий истиқлол ғояларини тарғиб этиш ва маданий-маънавий қадриятларимизни тиклаш йўлида олиб бораётган ижодий изланишларини намойиш этдилар, – дейди туман хотин-қизлар қўмитаси раиси Арзиой Идрисова.
Иштирокчилар уч босқичда ўзларининг қобилиятларини намойиш этишди.
Санъат йўналиши бўйича Элнора Абдуллаева, адабиёт йўналишида Мухлиса Тиллахонова, маданият йўналишида Камила Юлдашева ва таълим йўналишида Гулҳаё Ҳамидуллаева ғолиб деб топилиб, Тошкент шаҳар босқичида иштирок этиш учун тавсия этилдилар.
Тадбир сўнгида ғолибларга таъсисчиларнинг фахрий ёрлиқ ва эсдалик совғалари топширилди.
Гавҳар МУҲАММАДЖОНОВА
